14.მე-14 ჯგუფის ელემენტები
14.1.ნახშირბადი
კითხვა:
რა არის წყალაირი? რა სამრეწველო გამოყენება აქვს წყალაირს? შეადარეთ წყალაირი გენერატორის აირს. რომელ აირს აქვს უფრო მეტი თბოუნარიანობა?
პასუხი:
წყალაირი წარმოადგენს CO-ს და H2-ის ნარევს, რომლის მიღება შესაძლებელია 1200 °C-მდე გავარვარებულ ნახშირზე წყლის ორთქლის გატარებით:
C + H2O → CO + H2
გენერატორში (ღუმელში) კოქსის ფენებს ქვემოდან აწვდიან ჰაერს. ქვედა ფენაში კოქსის წვით მიიღება CO2, რომელიც კოქსის ფენასთან შეხებით წარმოქმნის CO-ს:
CO2 + C→ 2 CO
წარმოქმნილი CO ჰაერიდან დარჩენილ აზოტთან წარმოქმნის ნარევს, რომელსაც გენერატორის აირი ეწოდება. გენერატორის აირის წვის სითბოს ნაწილი ხმარდება აზოტის გათბობას. წყალაირი წვის დროს მეტ სითბოს გამოყოფს, რადგან მასში ორივე აირი წვადია.
