1.პირველი (IA) ჯგუფის ელემენტები
1.1.წყალბადი
კითხვა:
რით აიხსნება მოლეკულური წყალბადის დიდი მდგრადობა და ატომური წყალბადის მაღალი ქიმიური აქტიურობა?
პასუხი:
მოლეკულური წყალბადის დიდი მდგრადობა განპირობებულია მასში შემავალ წყალბადის ატომებს შორის მტკიცე კოვალენტური ბმების არსებობით, რის გამო, წყალბადის მოლეკულის ატომებად დასაშლელად საჭიროა დიდი რაოდენობის სითბური ენერგია:
H2 ⇄ 2 H ΔH°298 = - 434 კჯ/მოლი
წყალბადის ატომი, მცირე ზომისა და უნიკალური აღნაგობის გამო, გაცილებით აქტიურია, ვიდრე მისი მოლეკულა. მოლეკულური წყალბადის რომელიმე ქიმიურ რეაქციაში შესასვლელად, პირველ რიგში, უნდა მოხდეს მისი ატომებად დაშლა, რაც ენერგიის დიდ დანახარჯს მოითხოვს. ატომურ წყალბადთან რეაქციის შემთხვევაში აქტივაციის ენერგია ძალიან მცირეა. მას ღებულობენ უშუალოდ ჩასატარებელი რეაქციის ზონაში. მისი მიღების ერთ-ერთი მეთოდია მოლეკულურ წყალბადზე ელექტრული განმუხტვის მოქმედება მაღალი წნევის პირობებში.
