დღეს ჩვენი სტუმარია საჩხერის მე-2 სკოლის ქიმიის მასწავლებელი, მასწავლებლის ეროვნული ჯილდო-2018-ის ხუთეულის წევრი ელისო აბრამიშვილი



 

მიღწევაში პროექტებით სწავლება მეხმარება

- ქალატონო ელისო, პირველ რიგში გილოცავთ მასწავლებლის ეროვნული ჯილდოს კონკურსის ხუთეულში დასახელებას. რას წარმოადგენს თქვენთვის მასწავლებლის ეროვნული ჯილდო?

- ჩემთვის ამ პროექტში მონაწილეობა დიდი პასუხისმგებლობა და მოვალეობაა. ბედნიერი ვარ, რომ მომეცა იმ ადამიანებთან ურთიერთობის საშუალება, რომლებიც ამ პროექტის მონაწილეები არიან. საშუალება მომცა შემეფასებინა ჩემი პედაგოგიური საქმიანობა. მომცა თავდაჯერება იმისა, რომ რასაც მოინდომებ ყველაფერს მიაღწევ, ეს უკვე წარმატების საწინდარია. აღნიშნული პროექტი მნიშვნელოვანია იმ მხრივ, რომ ხელს უწყობს მასწავლებლის პროფესიის პოპულარიზაციას. მასწავლებელი საზოგადოების განვითარების პროცესში მნიშვნელოვან როლს ასრულებს, რადგან მომავალი განათლებაშია.

 

- როდის და როგორ გადაწყვიტეთ მასწავლებლობა?

- რატომ ავირჩიე ეს პროფესია? ეს ჩემი არაჩვეულებრივი მასწავლებლის მარიამ ქამუშაძის დამსახურებაა. რომლის წერილმა ჩემი ცხოვრების ყველაზე ძნელ ეტაპზე სწორი გზა მაპოვნინა. შემდეგ მახსოვს ჩემი ანალიზური ქიმიის პროფესორის ბატონი ომარ სუპატაშვილის სიტყვები: ელისო შენ კარგი მასწავლებელი იქნები. ჩემი პირველი დღე სკოლაში, პირველი გაკვეთილი, თეთრად გათენებული ღამეები, სარკის წინ მოყოლილი ასახსნელი მასალა. თუმცა ეს დღესაც ასეა. სწავლა სირცხვილი არ არის. პედაგოგი, როგორი დიდი გამოცდილებაც არ უნდა ჰქონდეს სიახლეს ყოველთვის უნდა ეძებდეს.

 

- როგორ მოხვდით ამ კონკურსში?

- ამ კონკურსში წარმადგინა ჩემმა სკოლამ, პედაგოგიურმა კოლექტივმა. ჩემი სტიმული იყო ჩვენი სკოლის ინგლისურის მასწავლებელი მაია ტყემალაძე, გასული წლის მასწავლებლის ეროვნული ჯილდოს ათეულის წევრი.

 

- ჩამოთვალეთ თქვენი, როგორც მასწავლებლის 5 ყველაზე დიდი მიღწევა?

- ჩემთვის მნიშვნელოვანია მოსწავლეებში დავნერგო ის ღირებულებები, რომლებიც მათ საზოგადოების სრულფასოვან წევრებად ჩამოაყალიბებს. ცოდნასთან ერთად მოსწავლეებს ვუვითარებ სასიცოცხლოდ მნიშვნელოვან უნარ-ჩვევებს, რომელთა დახმარებით ბავშვები იცავენ საკუთარ უფლებებს, პასუხისმგებლობით ეკიდებიან მათზე დაკისრებულ მოვალეობებს. ვცდილობ ჩემი მოსწავლეები იყვნენ დამოუკიდებლები და შემწყნარებლები სხვისი აზრის მიმართ. ამ ყველაფრის მიღწევაში მეხმარება პროექტებით სწავლება, შემოქმედებითი მიდგომა თითოეული გაკვეთილის მიმართ. მნიშვნელოვანია არაფორმალური განათლება, რომლის განხორციელებაში ვიყენებ კლუბურ მუშაობას. კლუბის მუშაობის დამთავრების შემდეგ, ბავშვები ყოველთვის მსჯელობენ ცდის შედეგზე, ფიქრობენ, თუ როგორ გამოიყენებენ ცდის ჩატარებისას მიღებულ ცოდნას პრაქტიკაში.

 მოსწავლეებთან ერთად აქტიურად ვმონაწილეობ ადგილობრივ და საერთაშორისო კონკურსებში. კვლევითი პროექტი „მეორადი ზეთების უტილიზაცია და მათი ბიოდიზელად გარდაქმნა“. აღნიშნულმა პროექტმა დაიკავა მესამე საპრიზო ადგილი სტამბოლში, MEF 24-ე საერთაშორისო პროექტების ოლიმპიადაზე. ვცდილობ ხელი შევუწყო მოსწავლეებს ჩემს საგანში მიღებული ცოდნა და გამოცდილება სხვადასხვა შინაარსობრივ კონტექსტში გადაიტანონ და გამოიყენონ. 2016 წელს მივიღეთ მონაწილეობა პროექტში „ბრილიანტის გამოწვევა“, სადაც მოსწავლეთა ჯგუფმა წარადგინა ბიოდიზელის გამოყენების ბიზნეს იდეა.

2017 წელს განვახორციელეთ კვლევითი პროექტი „ფოსფორაპატიტის გამოყენება სტომატოლოგიასა და ძვლოვან ქირურგიაში“. პროექტმა დაიკავა მეორე საპრიზო ადგილი სტამბულში MEF უნივერსიტეტის 26-ე საერთაშორისო პროექტების ოლიმპიადაზე.

პროექტი: „მენიუ კალორიებით -ერთი ნაბიჯი ჯანსაღი კვებისკენ“ წარვადგინეთ შოთა რუსთაველის ეროვნული სამეცნიერო ფონდის მიერ გამოცხადებულ კონკურსში „კვლევები მოსწავლეთა მონაწილეობით“ და მოვიგეთ 12000 ლარიანი გრანტი. აღვჭურვეთ ქიმიის ლაბორატორია. მოსწავლეებმა განსაზღვრეს მზა საკვები პროდუქტების ენერგეტიკული ღირებულებები კალორიმეტრის საშუალებით და მიღებული შედეგები შეთავაზეს თბილისსა და საჩხერეში არსებულ კვების ობიექტებს, მენიუში ფასების გვერდით შესაბამისი კალორიების განსათავსებელად. ჩვენ ვთვლით, რომ ეს გარკვეული ინოვაცია იყო, რადგან არცერთ რესტორანსა და სწრაფი კვების ობიექტში მზა კერძებზე არ არის მითითებული ენერგეტიკული ღირებულება.

პროექტი „ფერებით მოვეფეროთ ერთმანეთს“. მოსწავლეებმა შექმნეს ოთხ ჯგუფი ოთხი ფერის მიხედვით. ეკოლოგიურად სუფთა ბუნებრივი პროდუქტებით მოამზადეს საღებავები. ესტუმრნენ „საქართველოს ყრუთა კავშირის საჩხერის ფილიალის“ აღსაზრდელებს მათთან ერთად შექმნეს ნახატები, მოაწყვეს გამოფენა და ერთი ლამაზი დღე აჩუქეს ბავშვებს. აღნიშნული პროექტი წარვადგინეთ პოსტერის სახით მოსწავლეთა რესპუბლიკურ კონფერენციაზე „ქიმია ხვალ 2016“.

ჩემთვის როგორც მასწავლებლისთვის მნიშვნელოვანია ის ფაქტი, რომ ჩემი მოსწავლეები უკვე ჩემი კოლეგები არიან. მათ წარმატებით დაამთავრეს თბილისის სახელმწიფო და საქართველოს ტექნიკური უნივერსიტეტის ქიმიის ფაკულტეტი. ჩემი მოსწავლეები სანდიეგოს სახელმწიფო უნივერსიტეტის ბიოქიმიის ფაკულტეტის წარმატებულის სტუდენტები არიან. ჩემთვის მნიშვნელოვანია მხარდაჭერა მათი მომავალი პროფესიული ზრდისთვის.

 

- როგორი უნდა იყოს თანამედროვე ქიმიის მასწავლებელი?

გაკვეთილის დაგეგმვისას ყოველთვის უნდა გაითვალისწინოს მოსწავლეთა ინდივიდუალური შესაძლებლობები და საგნისადმი დამოკიდებულება. ჩართულობის და მოტივაციის გაზრდის მიზნით გამოიყენოს მრავალფეროვანი მეთოდები და სტრატეგიები. ქიმიის გაკვეთილები ჩაატაროს ლაბორატორიაში, მოაწყოს შესაბამისი გარემო თითოეული გაკვეთილის მიზნიდან გამომდინარე. მოსწავლეებს მისცეს საშუალება თვითონ დაგეგმონ და განახორციელონ, მისი მეთვალყურეობის ქვეშ ექსპერიმენტები, მოახდინონ პროცესების მოდელირება და თეორიული ცოდნა დაუკავშირონ ცხოვრებისეულ სიტუაციებს. ეს ყოველივე გაზრდის მოსწავლეთა ინტერესს ქიმიის მიმართ.

 

- რა არის ამისათვის საჭირო?

- 21-ე საუკუნე გამოწვევების საუკუნეა, მასწავლებელი ყოველთვის მზად უნდა იყოს სიახლეების მიღების მიმართ და ზრუნავდეს საკუთარი პროფესიონალიზმის ასამაღლებლად. მუდმივად ზრუნავდეს განვითარებაზე, ეცნობოდეს თანამედროვე ლიტერატურას, ახალ გამოწვევებს, სწავლებისა და შეფასების ახალ მეთოდებს. ესწრებოდეს ტრენინგებს. ტრენინგი მასწავლებლის პროფესიული ზრდისთვის მნიშვნელოვანია. ყოველი ახალი მიღებული ცოდნა და გამოცდილება მასწავლებელს ეხმარება საკუთარი განვითარების ორგანიზებაში.

 

- შემდეგ კონკურსში ქიმიის მასწავლებლის წარდგენის უფლება რომ მოგცენ, ვის წარადგენდით?

- წარვადგენდი ჭიათურის მუნიციპალიტეტის სოფელ წირქვალის საჯარო სკოლის ქიმიის მასწავლებელს ვაჟა ღავთაძეს.

 

ესაუბრა www.chemistry.ge

2018-09-05

 

 

ვეძებ ქიმიკოსს

ვეძებ თემატიკას

ვეძებ ფრაზას